ភ្នំពេញ៖ អគ្គស្នងការរង និងជាស្នងការនគរបាលរាជធានីភ្នំពេញ លោក ជួន ណារិន្ទ ស្នើឱ្យភាគីចោទប្រកាន់មកលើនគរបាលចរាចរណ៍ស្ដុបក្ដាន់ពីរ ចេញមកសារភាពឱ្យទាន់ពេល ដោយលោកត្រូវការរកយុត្តិធម៌ និងកិត្តិយសឲ្យអ្នករងគ្រោះពិតប្រាកដ។

យោងតាមសារលើបណ្តាញសង្គមផ្ទាល់របស់លោក ជួន ណារិន្ទ នាល្ងាចថ្ងៃទី៧ ខែកុម្ភៈ ឆ្នាំ២០២៤ បានឱ្យដឹងថា លោកខកចិត្តចំពោះដោយរង់ចាំភាគីដែលចោទប្រកាន់មន្រ្តីនគរបាលខាងលើ មកស្នងការដ្ឋាននគរបាលរាជធានី ដើម្បីសហការណ៍ជាមួយសមត្ថកិច្ច ដើម្បីរកយុត្តិធម៌ជូន តែមិនឃើញបង្ហាញខ្លួន។

ជាមួយគ្នានេះ លោក ជួន ណារិន្ទ បានបញ្ជាក់ឱ្យដឹងថា ភាគីដែលបានបង្ហោះសារចោទប្រកាន់មន្រ្តីនគរបាលនោះ មិនមែនជាតួអង្គពិតនោះទេ ខណៈលោកស្នងការស្នើឱ្យសាមីខ្លួនពិតប្រាកដចូលខ្លួនមកសារភាពជាបន្ទាន់ ដើម្បីរកយុត្តិធម៌ឱ្យអ្នករងគ្រោះពិតប្រាកដ។

សារលោកស្នងការមានខ្លឹមសារថា៖ «ខ្ញុំបាទសូមជូនព័ត៌មានដល់មហាជនទាំងអស់ជ្រាបថាក្មួយស្រី ម៉ូលីកា មិនមែនជាតួអង្គក្នុងរឿងនេះទេ (ខ្ញុំស្នើសុំអ្នកនិពន្ឋចេញសារភាពឲ្យទាន់ពេល) ព្រោះខ្ញុំតម្រូវការរកយុត្តិធម៌ និងកិត្តិយសឱ្យអ្នករងគ្រោះពិតប្រាកដ»។

គួរឱ្យដឹងដែរថា សាធារណជនសម្តែងការមិនពេញចិត្តចំពោះសកម្មភាពការងាររបស់មន្ត្រីនគរបាលចរាចរណ៍នៅស្តុបក្តាន់ពីរ ពោលមិនយោគយល់អនុគ្រោះចំពោះអ្នកជំងឺដែលត្រូវការការសង្គ្រោះបន្ទាន់។ មិនតែប៉ុណ្ណោះក្នុងចំណោមមន្ត្រីនគរបាលចរាចរណ៍ទាំងនោះ មានមន្ត្រីនគរបាលម្នាក់បានសុំលេខទាក់ទងញ៉ែរតាមតេឡេក្រាមទៀតផង ហើយសារទាក់ទងញ៉ែរតាំងនោះត្រូវបានចែករំលែកពេញបណ្តាញសង្គមធ្វើឱ្យមានការប្រតិកម្មបន្ថែមពីសាធារណជនផងដែរ៕